Кар лун

Кар лун (рочӧн День города) — быд вося гаж пӧшти став гырысь каръясын (Россияын да вӧвлӧм СССР-ын), сійӧс пасйӧны пырджык шойччан лунъясӧ (вежалунӧ).

Карлӧн лун, страналӧн медшӧр лункӧд (шуам, Россия лункӧд) ӧттшӧтш, - тайӧ пырджык медся уна йӧза, дасьтысян ыджда серти медся ыджыд гаж, кытчӧ пырӧдчӧ быд карын олысь. Тайӧ лунӧ нуӧдӧны гажӧдчан мероприятиеяс - карса веськӧдлысьяслӧн выступлениеяс, парадъяс, шествиеяс, йӧзкостса гуляйтӧмъяс, ярмангаяс, праздничнӧй концертъяс, уличвывса перфомансъяс, выставкаяс, ордйысьӧмъяс. Кар луныс векджык помасьӧ фейерверкъясӧн да салютӧн. Пырджык гажыс заводитчӧ вӧскресенньӧ водзвывса субӧтаӧ (мӧд ногӧн кӧ, кык лун: субӧта да вӧскресенньӧ). Торйӧн нин паськыда, тшӧкыда страна пасьта да весиг войтыркостса тшупӧдын, пасйӧны каръяслысь юбилейяс.

Ӧткымын кар йитӧмаӧсь ассьыныс Кар лунъяссӧ канму да профессиональнӧй гажъяскӧд: Россия лун да мукӧд канму, республика-регионлӧн лун, машиностроительлӧн лун, химиклӧн лун, металлурглӧн лун, строительлӧн лун, железнодорожниклӧн лун, шахтёрлӧн лун (шуам, Донецк) да мукӧд; ӧткымын каръяслӧн (СНГ-лӧн европаса юкӧнын) тайӧ 1941-1944 воясӧ "немецко-фашистскӧй захватчикъясысь мездан лун" (шуам, Харьков); уна карлӧн - карлы подув пуктан лун. СССР-ын медводдза официальнӧя пасйӧм кар лунӧн вӧлі Москвалы 800 во тырӧм 1947 воын.